طريقة عمل ملوخية بالأرانب على الطريقة المصرية

لو عمرك ما جربتي طريقة عمل ملوخية بالأرانب، فأنتي فعلاً فوّتي على نفسك طعم من الزمن الجميل. أكلة أصيلة، كانت دايمًا ضيفة عزيزة على السفرة وقت العزايم أو الغدا يوم الجمعة.

هنا في وصفات أكل عربية هتلاقي طريقة عملها خطوة بخطوة، من غير تعقيد، بمكونات بسيطة موجودة في كل بيت.

أولًا: نسلق الأرنب

المكونات:

• أرنب مقطّع 4 أو 6 قطع

• بصلة كبيرة مقطعة 4 أجزاء

• ورق لورا – حبهان – فصين مستكة

• ملح وفلفل

الطريقة:

1. اغسل الأرنب كويس جدًا بمياه وخل وملح، علشان الزفارة.

2. في حلة كبيرة، حط شوية زيت أو سمنة وشوّح المستكة، الحبهان وورق اللورا لحد ما تطلع الريحة.

3. نزل بالبصل وبعدها قطع الأرنب وشوّحهم شوية لحد ما يتغير لونهم.

4. غطِّي بالمياه السخنة، وسبه يغلي.

5. شيل الريم (الرغاوي اللي تطلع فوق) علشان الشوربة تبقى صافية.

6. سيبه على نار هادية حوالي 45 دقيقة، أو لحد ما اللحمة تستوي.

ثانيًا: نجهز الملوخية

المكونات:

• نص كيلو ملوخية خضراء مفرومة (طازة أو مجمدة)

• 4 فصوص توم مفروم

• ملعقة كبيرة كزبرة ناشفة

• ملعقة سمنة بلدي

• شوربة الأرنب

الطريقة:

1. في حلة صغيرة، اغلي حوالي كوبين من شوربة الأرنب.

2. أول ما تغلي، ضيف الملوخية وقلبها بسرعة علشان ما تفصلش.

3. سيبها تغلي غلوة واحدة بس واطفي النار.

ثالثًا: الطشة (سر الطعم)

الطريقة:

1. في طاسة صغيرة، سيّح السمنة.

2. ضيف الثوم والكزبرة، وقلّبهم لحد ما لونهم يبقى دهبي وريحته تطلع.

3. على طول، نزل بالطشة على الملوخية وهي سخنة وغطّي الحلة علشان الريحة “تتحبس” جواها.

التقديم:

قدمي الملوخية جنب الأرز الأبيض، والأرنب المسلوق يتحمّر في شوية سمنة أو يقدم زي ما هو.
عيش بلدي طازة؟ ضروري.
وبالهناء والشفاء ومتنسيش تتابعي حساب وصفات أكل عربية على انستجرام